কঠোপনিষদ প্রথম অধ্যায় প্রথম ৱল্লী

This entry is part 1 of 1 in the series কঠোপনিষদ
  • কঠোপনিষদ প্রথম অধ্যায় প্রথম ৱল্লী

॥ কঠোপনিষত্ ॥


॥ অথ কঠোপনিষদ্ ॥

ॐ সহ নাৱৱতু । সহ নৌ ভুনক্তু । সহৱীর্যং করৱাৱহৈ ।
তেজস্ৱি নাৱধীতমস্তু । মা ৱিদ্ৱিষাৱহৈ ॥

ॐ শান্তিঃ শান্তিঃ শান্তিঃ ॥

ॐ উশন্ হ ৱৈ ৱাজশ্রৱসঃ সর্ৱৱেদসং দদৌ ।
তস্য হ নচিকেতা নাম পুত্র আস ॥ ১॥

তঁ হ কুমারঁ সন্তং দক্ষিণাসু
নীযমানাসু শ্রদ্ধাৱিৱেশ সোঽমন্যত ॥ ২॥

পীতোদকা জগ্ধতৃণা দুগ্ধদোহা নিরিন্দ্রিযাঃ ।
অনন্দা নাম তে লোকাস্তান্ স গচ্ছতি তা দদত্ ॥ ৩॥

স হোৱাচ পিতরং তত কস্মৈ মাং দাস্যসীতি ।
দ্ৱিতীযং তৃতীযং তঁ হোৱাচ মৃত্যৱে ত্ৱা দদামীতি ॥ ৪॥

বহূনামেমি প্রথমো বহূনামেমি মধ্যমঃ ।
কিঁ স্ৱিদ্যমস্য কর্তৱ্যং যন্মযাঽদ্য করিষ্যতি ॥ ৫॥

অনুপশ্য যথা পূর্ৱে প্রতিপশ্য তথাঽপরে ।
সস্যমিৱ মর্ত্যঃ পচ্যতে সস্যমিৱাজাযতে পুনঃ ॥ ৬॥

ৱৈশ্ৱানরঃ প্রৱিশত্যতিথির্ব্রাহ্মণো গৃহান্ ।
তস্যৈতাঁ শান্তিং কুর্ৱন্তি হর ৱৈৱস্ৱতোদকম্ ॥ ৭॥

আশাপ্রতীক্ষে সংগতঁ সূনৃতাং
চেষ্টাপূর্তে পুত্রপশূঁশ্চ সর্ৱান্ ।
এতদ্ৱৃঙ্ক্তে পুরুষস্যাল্পমেধসো
যস্যানশ্নন্ৱসতি ব্রাহ্মণো গৃহে ॥ ৮॥

তিস্রো রাত্রীর্যদৱাত্সীর্গৃহে মে-
ঽনশ্নন্ ব্রহ্মন্নতিথির্নমস্যঃ ।
নমস্তেঽস্তু ব্রহ্মন্ স্ৱস্তি মেঽস্তু
তস্মাত্প্রতি ত্রীন্ৱরান্ৱৃণীষ্ৱ ॥ ৯॥

শান্তসংকল্পঃ সুমনা যথা স্যাদ্
ৱীতমন্যুর্গৌতমো মাঽভি মৃত্যো ।
ত্ৱত্প্রসৃষ্টং মাঽভিৱদেত্প্রতীত
এতত্ ত্রযাণাং প্রথমং ৱরং ৱৃণে ॥ ১০॥

যথা পুরস্তাদ্ ভৱিতা প্রতীত
ঔদ্দালকিরারুণির্মত্প্রসৃষ্টঃ ।
সুখঁ রাত্রীঃ শযিতা ৱীতমন্যুঃ
ত্ৱাং দদৃশিৱান্মৃত্যুমুখাত্ প্রমুক্তম্ ॥ ১১॥

স্ৱর্গে লোকে ন ভযং কিংচনাস্তি
ন তত্র ত্ৱং ন জরযা বিভেতি ।
উভে তীর্ত্ৱাঽশনাযাপিপাসে
শোকাতিগো মোদতে স্ৱর্গলোকে ॥ ১২॥

স ত্ৱমগ্নিঁ স্ৱর্গ্যমধ্যেষি মৃত্যো
প্রব্রূহি ত্ৱঁ শ্রদ্দধানায মহ্যম্ ।
স্ৱর্গলোকা অমৃতত্ৱং ভজন্ত
এতদ্ দ্ৱিতীযেন ৱৃণে ৱরেণ ॥ ১৩॥

প্র তে ব্রৱীমি তদু মে নিবোধ
স্ৱর্গ্যমগ্নিং নচিকেতঃ প্রজানন্ ।
অনন্তলোকাপ্তিমথো প্রতিষ্ঠাং
ৱিদ্ধি ত্ৱমেতং নিহিতং গুহাযাম্ ॥ ১৪॥

পড়ুন  উপনিষদের শক্তিবাদ-ভাষ্য

লোকাদিমগ্নিং তমুৱাচ তস্মৈ
যা ইষ্টকা যাৱতীর্ৱা যথা ৱা ।
স চাপি তত্প্রত্যৱদদ্যথোক্তং
অথাস্য মৃত্যুঃ পুনরেৱাহ তুষ্টঃ ॥ ১৫॥

তমব্রৱীত্ প্রীযমাণো মহাত্মা
ৱরং তৱেহাদ্য দদামি ভূযঃ ।
তৱৈৱ নাম্না ভৱিতাঽযমগ্নিঃ
সৃঙ্কাং চেমামনেকরূপাং গৃহাণ ॥ ১৬॥

ত্রিণাচিকেতস্ত্রিভিরেত্য সন্ধিং
ত্রিকর্মকৃত্তরতি জন্মমৃত্যূ ।
ব্রহ্মজজ্ঞং দেৱমীড্যং ৱিদিত্ৱা
নিচায্যেমাঁ শান্তিমত্যন্তমেতি ॥ ১৭॥

ত্রিণাচিকেতস্ত্রযমেতদ্ৱিদিত্ৱা
য এৱং ৱিদ্ৱাঁশ্চিনুতে নাচিকেতম্ ।
স মৃত্যুপাশান্ পুরতঃ প্রণোদ্য
শোকাতিগো মোদতে স্ৱর্গলোকে ॥ ১৮॥

এষ তেঽগ্নির্নচিকেতঃ স্ৱর্গ্যো
যমৱৃণীথা দ্ৱিতীযেন ৱরেণ ।
এতমগ্নিং তৱৈৱ প্রৱক্ষ্যন্তি জনাসঃ
তৃতীযং ৱরং নচিকেতো ৱৃণীষ্ৱ ॥ ১৯॥

যেযং প্রেতে ৱিচিকিত্সা মনুষ্যে-
ঽস্তীত্যেকে নাযমস্তীতি চৈকে ।
এতদ্ৱিদ্যামনুশিষ্টস্ত্ৱযাঽহং
ৱরাণামেষ ৱরস্তৃতীযঃ ॥ ২০॥

দেৱৈরত্রাপি ৱিচিকিত্সিতং পুরা
ন হি সুৱিজ্ঞেযমণুরেষ ধর্মঃ ।
অন্যং ৱরং নচিকেতো ৱৃণীষ্ৱ
মা মোপরোত্সীরতি মা সৃজৈনম্ ॥ ২১॥

দেৱৈরত্রাপি ৱিচিকিত্সিতং কিল
ত্ৱং চ মৃত্যো যন্ন সুজ্ঞেযমাত্থ ।
ৱক্তা চাস্য ত্ৱাদৃগন্যো ন লভ্যো
নান্যো ৱরস্তুল্য এতস্য কশ্চিত্ ॥ ২২॥

শতাযুষঃ পুত্রপৌত্রান্ৱৃণীষ্ৱা
বহূন্পশূন্ হস্তিহিরণ্যমশ্ৱান্ ।
ভূমের্মহদাযতনং ৱৃণীষ্ৱ
স্ৱযং চ জীৱ শরদো যাৱদিচ্ছসি ॥ ২৩॥

এতত্তুল্যং যদি মন্যসে ৱরং
ৱৃণীষ্ৱ ৱিত্তং চিরজীৱিকাং চ ।
মহাভূমৌ নচিকেতস্ত্ৱমেধি
কামানাং ত্ৱা কামভাজং করোমি ॥ ২৪॥

যে যে কামা দুর্লভা মর্ত্যলোকে
সর্ৱান্ কামাঁশ্ছন্দতঃ প্রার্থযস্ৱ ।
ইমা রামাঃ সরথাঃ সতূর্যা
ন হীদৃশা লম্ভনীযা মনুষ্যৈঃ ।
আভির্মত্প্রত্তাভিঃ পরিচারযস্ৱ
নচিকেতো মরণং মাঽনুপ্রাক্ষীঃ ॥ ২৫॥

শ্ৱোভাৱা মর্ত্যস্য যদন্তকৈতত্
সর্ৱেংদ্রিযাণাং জরযংতি তেজঃ ।
অপি সর্ৱং জীৱিতমল্পমেৱ
তৱৈৱ ৱাহাস্তৱ নৃত্যগীতে ॥ ২৬॥

ন ৱিত্তেন তর্পণীযো মনুষ্যো
লপ্স্যামহে ৱিত্তমদ্রাক্ষ্ম চেত্ত্ৱা ।
জীৱিষ্যামো যাৱদীশিষ্যসি ত্ৱং
ৱরস্তু মে ৱরণীযঃ স এৱ ॥ ২৭॥

অজীর্যতামমৃতানামুপেত্য
জীর্যন্মর্ত্যঃ ক্ৱধঃস্থঃ প্রজানন্ ।
অভিধ্যাযন্ ৱর্ণরতিপ্রমোদান্
অতিদীর্ঘে জীৱিতে কো রমেত ॥ ২৮॥

যস্মিন্নিদং ৱিচিকিত্সন্তি মৃত্যো
যত্সাম্পরাযে মহতি ব্রূহি নস্তত্ ।
যোঽযং ৱরো গূঢমনুপ্রৱিষ্টো
নান্যং তস্মান্নচিকেতা ৱৃণীতে ॥ ২৯॥

॥ ইতি কঠোপনিষদি প্রথমাধ্যাযে প্রথমা ৱল্লী ॥

পড়ুন  উপনিষদের শক্তিবাদ-ভাষ্য

Hits: 495

Leave a Reply

Your email address will not be published. Required fields are marked *