ঈশাৱাস্য উপনিষদ্ শাঙ্করভাষ্য সহিত

ঈশাৱাস্য উপনিষদ্ শাঙ্করভাষ্য সহিত

পূর্ণমদঃ পূর্ণমিদং পূর্ণাত্পূর্ণমুদচ্যতে ।

পূর্ণস্য পূর্ণমাদায পূর্ণমেৱাৱশিষ্যতে ॥

শান্তিঃ শান্তিঃ শান্তিঃ ॥

ঈশাৱাস্যমিদঁ্ সর্ৱং যত্কিঞ্চ জগত্যাং জগত্ ।

তেন ত্যক্তেন ভুঞ্জীথা মা গৃধঃ কস্য স্ৱিদ্ধনম্ ॥ ১.১.১ ॥

॥১.১.১॥ ঈশা ঈষ্টে ইতি ঈট্? তেন ঈশা। ঈশিতা পরমেশ্ৱরঃ পরমাত্মা সর্ৱস্য। স হি সর্ৱমীষ্টে সর্ৱজন্তূনামাত্মা সন্ প্রত্যগাত্মতযা। তেন স্ৱেন রূপেণাত্মনা ঈশা ৱাস্যম্ আচ্ছাদনীযম্। কিম্ ইদং সর্ৱং যত্কিং চ যত্কিংচিত্ জগত্যাং পৃথিৱ্যাং জগত্ তত্সর্ৱম্। স্ৱেনাত্মনা ঈশেন প্রত্যগাত্মতযা অহমেৱেদং সর্ৱমিতি পরমার্থসত্যরূপেণানৃতমিদং সর্ৱং চরাচরমাচ্ছাদনীযং পরমাত্মনা। যথা চন্দনাগর্ৱাদেরুদকাদিসংবন্ধজক্লেদাদিজমৌপাধিকং দৌর্গন্ধ্যং তত্স্ৱরূপনিঘর্ষণেনাচ্ছাদ্যতে স্ৱেন পারমার্থিকেন গন্ধেন? তদ্ৱদেৱ হি স্ৱাত্মন্যধ্যস্তং স্ৱাভাৱিকং কর্তৃত্ৱভোক্তৃত্ৱাদিলক্ষণং জগদ্দ্ৱৈতরূপং পৃথিৱ্যাম্? জগত্যামিত্যুপলক্ষণার্থত্ৱাত্সর্ৱমেৱ নামরূপকর্মাখ্যং ৱিকারজাতং পরমার্থসত্যাত্মভাৱনযা ত্যক্তং স্যাত্। এৱমীশ্ৱরাত্মভাৱনযা যুক্তস্য পুত্রাদ্যেষণাত্রযসংন্যাসে এৱাধিকারঃ? ন কর্মসু। তেন ত্যক্তেন ত্যাগেনেত্যর্থঃ। ন হি ত্যক্তো মৃতঃ পুত্রো ভৃত্যো ৱা আত্মসংবন্ধিতাভাৱাদাত্মানং পালযতি। অতস্ত্যাগেনেত্যযমেৱার্থঃ। ভুঞ্জীথাঃ পালযেথাঃ। এৱং ত্যক্তৈষণস্ত্ৱং মা গৃধঃ গৃধিম্ আকাঙ্ক্ষাং মা কার্ষীঃ ধনৱিষযাম্। কস্য স্ৱিত্ কস্যচিত্ পরস্য স্ৱস্য ৱা ধনং মা কাঙ্ক্ষীরিত্যর্থঃ। স্ৱিদিত্যনর্থকো নিপাতঃ। অথৱা? মা গৃধঃ। কস্মাত্ কস্য স্ৱিদ্ধনম্ ইত্যাক্ষেপার্থঃ। ন কস্যচিদ্ধনমস্তি? যদ্গৃধ্যেত। আত্মৈৱেদং সর্ৱমিতীশ্ৱরভাৱনযা সর্ৱং ত্যক্তম্। অত আত্মন এৱেদং সর্ৱম্? আত্মৈৱ চ সর্ৱম্। অতো মিথ্যাৱিষযাং গৃধিং মা কার্ষীরিত্যর্থঃ॥ এৱমাত্মৱিদঃ পুত্রাদ্যেষণাত্রযসংন্যাসেনাত্মজ্ঞাননিষ্ঠতযা আত্মা রক্ষিতৱ্য ইত্যেষ ৱেদার্থঃ। অথেতরস্য অনাত্মজ্ঞতযাত্মগ্রহণাশক্তস্য ইদমুপদিশতি মন্ত্রঃ

কুর্ৱন্নেৱেহ কর্মাণি জিজীৱিষেচ্ছতঁ্ সমাঃ ।

এৱং ত্ৱযি নান্যথেতোঽস্তি ন কর্ম লিপ্যতে নরে ॥ ১.১.২ ॥

॥১.১.২॥ কুর্ৱন্নেৱ নির্ৱর্তযন্নেৱ ইহ কর্মাণি অগ্নিহোত্রাদীনি জিজীৱিষেত্ জীৱিতুমিচ্ছেত্ শতং শতসংখ্যাকাঃ সমাঃ সংৱত্সরান্। তাৱদ্ধি পুরুষস্য পরমাযুর্নিরূপিতম্। তথা চ প্রাপ্তানুৱাদেন যজ্জিজীৱিষেচ্ছতং ৱর্ষাণি তত্কুর্ৱন্নেৱ কর্মাণীত্যেতদ্ৱিধীযতে। এৱম্ এৱংপ্রকারে ত্ৱযি জিজীৱিষতি নরে নরমাত্রাভিমানিনি ইতঃ এতস্মাদগ্নিহোত্রাদীনি কর্মাণি কুর্ৱতো ৱর্তমানাত্প্রকারাত্ অন্যথা প্রকারান্তরং নাস্তি? যেন প্রকারেণাশুভং কর্ম ন লিপ্যতে কর্মণা ন লিপ্যস ইত্যর্থঃ। অতঃ শাস্ত্রৱিহিতানি কর্মাণ্যগ্নিহোত্রাদীনি কুর্ৱন্নেৱ জিজীৱিষেত্॥ কথং পুনরিদমৱগম্যতে পূর্ৱেণ মন্ত্রেণ সংন্যাসিনো জ্ঞাননিষ্ঠোক্তা? দ্ৱিতীযেন তদশক্তস্য কর্মনিষ্ঠেতি উচ্যতে জ্ঞানকর্মণোর্ৱিরোধং পর্ৱতৱদকম্প্যং যথোক্তং ন স্মরসি কিম্ ইহাপ্যুক্তম্ যো হি জিজীৱিষেত্স কর্মাণি কুর্ৱন্নেৱ ইতি ঈশা ৱাস্যমিদং সর্ৱম্ ? তেন ত্যক্তেন ভুঞ্জীথাঃ মা গৃধঃ কস্য স্ৱিদ্ধনম্ ইতি চ। ন জীৱিতে মরণে ৱা গৃধিং কুর্ৱীতারণ্যমিযাত্ ইতি পদং ততো ন পুনরেযাত্ ইতি চ সংন্যাসশাসনাত্। উভযোঃ ফলভেদং চ ৱক্ষ্যতি। ইমৌ দ্ৱাৱেৱ পন্থানাৱনুনিষ্ক্রান্ততরৌ ভৱতঃ ক্রিযাপথশ্চৈৱ পুরস্তাত্সংন্যাসশ্চ তযোঃ সংন্যাস এৱাতিরেচযতি ন্যাস এৱাত্যরেচযত্ ইতি তৈত্তিরীযকে। দ্ৱাৱিমাৱথ পন্থানৌ যত্র ৱেদাঃ প্রতিষ্ঠিতাঃ। প্রৱৃত্তিলক্ষণো ধর্মো নিৱৃত্তিশ্চ ৱিভাষিতঃ ইত্যাদি পুত্রায ৱিচার্য নিশ্িচতমুক্তং ৱ্যাসেন ৱেদাচার্যেণ ভগৱতা। ৱিভাগং চানযোঃ প্রদর্শযিষ্যামঃ॥ অথেদানীমৱিদ্ৱন্নিন্দার্থোঽযং মন্ত্র আরভ্যতে

অসুর্যা নাম তে লোকা অন্ধেন তমসাঽঽৱৃতাঃ ।

তা্ঁস্তে প্রেত্যাভিগচ্ছন্তি যে কে চাত্মহনো জনাঃ ॥ ১.১.৩ ॥

॥১.১.৩॥ অসুর্যাঃ পরমাত্মভাৱমদ্ৱযমপেক্ষ্য দেৱাদযোঽপ্যসুরাঃ। তেষাং চ স্ৱভূতা লোকা অসুর্যাঃ নাম। নামশব্দোঽনর্থকো নিপাতঃ। তে লোকাঃ কর্মফলানি লোক্যন্তে দৃশ্যন্তে ভুজ্যন্ত ইতি জন্মানি। অন্ধেন অদর্শনাত্মকেনাজ্ঞানেন তমসাআৱৃতাঃ আচ্ছাদিতাঃ। তান্ স্থাৱরান্তান্? প্রেত্য ত্যক্ত্ৱেমং দেহম্ অভিগচ্ছন্তি যথাকর্ম যথাশ্রুতম্। যে কে চ আত্মহনঃ আত্মানং ঘ্নন্তীত্যাত্মহনঃ। কে তে জনাঃ যেঽৱিদ্ৱাংসঃ। কথং তে আত্মানং নিত্যং হিংসন্তি অৱিদ্যাদোষেণ ৱিদ্যমানস্যাত্মনস্তিরস্করণাত্। ৱিদ্যমানস্যাত্মনো যত্কার্যং ফলমজরামরত্ৱাদিসংৱেদনাদিলক্ষণম্? তত্ হতস্যেৱ তিরোভূতং ভৱতীতি প্রাকৃতা অৱিদ্ৱাংসো জনা আত্মহন ইত্যুচ্যন্তে। তেন হ্যাত্মহননদোষেণ সংসরন্তি তে॥ যস্যাত্মনো হননাদৱিদ্ৱাংসঃ সংসরন্তি? তদ্ৱিপর্যযেণ ৱিদ্ৱাংসো মুচ্যন্তেঽনাত্মহনঃ? তত্কীদৃশমাত্মতত্ত্ৱমিত্যুচ্যতে

অনেজদেকং মনসো জৱীযো নৈনদ্দেৱা আপ্নুৱন্পূর্ৱমর্ষত্ ।

তদ্ধাৱতোঽন্যানত্যেতি তিষ্ঠত্তস্মিন্নপো মাতরিশ্ৱা দধাতি ॥ ১.১.৪ ॥

॥১.১.৪॥ অনেজত্ ন এজত্। এজৃ কম্পনে? কম্পনং চলনং স্ৱাৱস্থাপ্রচ্যুতিঃ? তদ্ৱর্জিতম্? সর্ৱদা একরূপমিত্যর্থঃ। তচ্চ একং সর্ৱভূতেষু। মনসঃ সংকল্পাদিলক্ষণাত্ জৱীযো জৱৱত্তরম্। কথং ৱিরুদ্ধমুচ্যতে ধ্রুৱং নিশ্চলমিদম্? মনসো জৱীয ইতি চ নৈষ দোষঃ? নিরুপাধ্যুপাধিমত্ত্ৱেনোপপত্তেঃ। তত্র নিরুপাধিকেন স্ৱেন রূপেণোচ্যতে অনেজদেকম্ ইতি। মনসঃ অন্তঃকরণস্য সংকল্পৱিকল্পলক্ষণস্যোপাধেরনুৱর্তনাত্। ইহ দেহস্থস্য মনসো ব্রহ্মলোকাদিদূরস্থসংকল্পনং ক্ষণমাত্রাদ্ভৱতীত্যতো মনসো জৱিষ্ঠত্ৱং লোকপ্রসিদ্ধম্। তস্মিন্মনসি ব্রহ্মলোকাদীন্ দ্রুতং গচ্ছতি সতি? প্রথমপ্রাপ্ত ইৱাত্মচৈতন্যাভাসো গৃহ্যতে। অতঃ মনসো জৱীযঃ ইত্যাহ। নৈনদ্দেৱাঃ? দ্যোতনাদ্দেৱাঃ চক্ষুরাদীনীন্দ্রিযাণি? এনত্ প্রকৃতমাত্মতত্ত্ৱং নাপ্নুৱন্ ন প্রাপ্তৱন্তঃ। তেভ্যো মনো জৱীযঃ। মনোৱ্যাপারৱ্যৱহিতত্ৱাদাভাসমাত্রমপ্যাত্মনো নৈৱ দেৱানাং ৱিষযীভৱতি যস্মাজ্জৱনান্মনসোঽপি পূর্ৱমর্ষত্ পূর্ৱমেৱ গতম্? ৱ্যোমৱদ্ৱ্যাপিত্ৱাত্। সর্ৱৱ্যাপি তদাত্মতত্ত্ৱং সর্ৱসংসারধর্মৱর্জিতং স্ৱেন নিরুপাধিকেন স্ৱরূপেণাৱিক্রিযমেৱ সত্? উপাধিকৃতাঃ সর্ৱাঃ সংসারৱিক্রিযা অনুভৱতীৱাৱিৱেকিনাং মূঢানামনেকমিৱ চ প্রতিদেহং প্রত্যৱভাসত ইত্যেতদাহ তত্ ধাৱতঃ দ্রুতং গচ্ছতঃ অন্যান্ আত্মৱিলক্ষণান্মনোৱাগিন্দ্রিযপ্রভৃতীন্ অত্যেতি অতীত্য গচ্ছতীৱ। ইৱার্থং স্ৱযমেৱ দর্শযতিতিষ্ঠদিতি? স্ৱযমৱিক্রিযমেৱ সদিত্যর্থঃ। তস্মিন্ আত্মতত্ত্ৱে সতি নিত্যচৈতন্যস্ৱভাৱে? মাতরিশ্ৱা মাতরি অন্তরিক্ষে শ্ৱযতি গচ্ছতীতি মাতরিশ্ৱা ৱাযুঃ সর্ৱপ্রাণভৃত্ক্রিযাত্মকঃ? যদাশ্রযাণি কার্যকরণজাতানি যস্মিন্নোতানি প্রোতানি চ? যত্সূত্রসংজ্ঞকং সর্ৱস্য জগতো ৱিধারযিতৃ? স মাতরিশ্ৱা? অপঃ কর্মাণি প্রাণিনাং চেষ্টালক্ষণানি অগ্ন্যাদিত্যপর্জন্যাদীনাং জ্ৱলনদহনপ্রকাশাভিৱর্ষণাদিলক্ষণানি? দধাতি ৱিভজতীত্যর্থঃ? ধারযতীতি ৱা ভীষাস্মাদ্ৱাতঃ পৱতে ইত্যাদিশ্রুতিভ্যঃ। সর্ৱা হি কার্যকরণৱিক্রিযা নিত্যচৈতন্যাত্মস্ৱরূপে সর্ৱাস্পদভূতে সত্যেৱ ভৱন্তীত্যর্থঃ॥ ন মন্ত্রাণাং জামিতাস্তীতি পূর্ৱমন্ত্রোক্তমপ্যর্থং পুনরাহ

তদেজতি তন্নৈজতি তদ্দূরে তদ্ৱন্তিকে ।

তদন্তরস্য সর্ৱস্য তদু সর্ৱস্যাস্য বাহ্যতঃ ॥ ১.১.৫ ॥

॥১.১.৫॥ তত্ আত্মতত্ত্ৱং যত্প্রকৃতম্ এজতি চলতি তদেৱ চ নৈজতি স্ৱতো নৈৱ চলতি? স্ৱতঃ অচলমেৱ সত্ চলতীৱেত্যর্থঃ। কিংচ? তদ্দূরে ৱর্ষকোটিশতৈরপ্যৱিদুষামপ্রাপ্যত্ৱাদ্দূর ইৱ। তদু অন্তিকে সমীপে অত্যন্তমেৱ ৱিদুষাম্? আত্মত্ৱাত্ ন কেৱলং দূরে? অন্তিকে চ। তত্ অন্তঃ অভ্যন্তরে অস্য সর্ৱস্য? য আত্মা সর্ৱান্তরঃ ইতি শ্রুতেঃ? অস্য সর্ৱস্য জগতো নামরূপক্রিযাত্মকস্য। তত্ উ সর্ৱস্য অস্য বাহ্যতঃ ৱ্যাপিত্ৱাদাকাশৱন্নিরতিশযসূক্ষ্মত্ৱাদন্তঃ প্রজ্ঞানঘন এৱ ইতি শাসনান্নিরন্তরং চ॥

যস্তু সর্ৱাণি ভূতান্যাত্মন্যেৱানুপশ্যতি ।

সর্ৱভূতেষু চাত্মানং ততো ন ৱিজুগুপ্সতে ॥ ১.১.৬ ॥

॥১.১.৬॥ যস্তু পরিৱ্রাট্ মুমুক্ষুঃ সর্ৱাণি ভূতানি অৱ্যক্তাদীনি স্থাৱরান্তানি আত্মন্যেৱ অনুপশ্যতি? আত্মৱ্যতিরিক্তানি ন পশ্যতীত্যর্থঃ। সর্ৱভূতেষু তেষ্ৱেৱ চ আত্মানং তেষামপি ভূতানাং স্ৱমাত্মানমাত্মত্ৱেন যথাস্য দেহস্যকার্যকরণসংঘাতস্যাত্মা অহং সর্ৱপ্রত্যযসাক্ষিভূতশ্চেতযিতা কেৱলো নির্গুণোঽনেনৈৱ স্ৱরূপেণাৱ্যক্তাদীনাং স্থাৱরান্তানামহমেৱাত্মেতি সর্ৱভূতেষু চাত্মানং নির্ৱিশেষং যস্ত্ৱনুপশ্যতি? সঃ ততঃ তস্মাদেৱ দর্শনাত্ ন ৱিজুগুপ্সতে ৱিজুগুপ্সাং ঘৃণাং ন করোতি। প্রাপ্তস্যৈৱানুৱাদোঽযম্। সর্ৱা হি ঘৃণা আত্মনোঽন্যদ্দুষ্টং পশ্যতো ভৱতি আত্মানমেৱাত্যন্তৱিশুদ্ধং নিরন্তরং পশ্যতো ন ঘৃণানিমিত্তমর্থান্তরমস্তীতি প্রাপ্তমেৱ ততো ন ৱিজুগুপ্সতইতি॥ ইমমেৱার্থমন্যোঽপি মন্ত্র আহ

যস্মিন্সর্ৱাণি ভূতান্যাত্মৈৱাভূদ্ৱিজানতঃ ।

তত্র কো মোহঃ কঃ শোকঃ একত্ৱমনুপশ্যতঃ ॥ ১.১.৭ ॥

॥১.১.৭॥ যস্মিন্সর্ৱাণি ভূতানি যস্মিন্ কালে যথোক্তাত্মনি ৱা? তান্যেৱ ভূতানি সর্ৱাণি পরমার্থাত্মদর্শনাত্ আত্মৈৱাভূত্ আত্মৈৱ সংৱৃত্তঃ পরমার্থৱস্তু ৱিজানতঃ? তত্র তস্মিন্কালে তত্রাত্মনি ৱা? কো মোহঃ কঃ শোকঃ। শোকশ্চ মোহশ্চ কামকর্মবীজমজানতো ভৱতি? ন ত্ৱাত্মৈকত্ৱং ৱিশুদ্ধং গগনোপমং পশ্যতঃ। কো মোহঃ কঃ শোক ইতি শোকমোহযোরৱিদ্যাকার্যযোরাক্ষেপেণাসংভৱপ্রকাশনাত্ সকারণস্য সংসারস্যাত্যন্তমেৱোচ্ছেদঃ প্রদর্শিতো ভৱতি॥ যোঽযমতীতৈর্মন্ত্রৈরুক্ত আত্মা? স স্ৱেন রূপেণ কিংলক্ষণ ইত্যাহ অযং মন্ত্রঃ

স পর্যগাচ্ছুক্রমকাযমৱ্রণমস্নাৱিরঁ্ শুদ্ধমপাপৱিদ্ধম্ ।

কৱির্মনীষী পরিভূঃ স্ৱযংভূর্যাথাতথ্যতোঽর্থান্ৱ্যদধাচ্ছাশ্ৱতীভ্যঃ সমাভ্যঃ ॥ ১.১.৮ ॥

॥১.১.৮॥ স পর্যগাত্? সঃ যথোক্ত আত্মা পর্যগাত্ পরি সমন্তাত্ অগাত্ গতৱান্? আকাশৱদ্ৱ্যাপীত্যর্থঃ। শুক্রং শুভ্রং জ্যোতিষ্মত্ দীপ্তিমানিত্যর্থঃ। অকাযম্ অশরীরং লিঙ্গশরীরৱর্জিত ইত্যর্থঃ। অৱ্রণম্ অক্ষতম্। অস্নাৱিরম্ স্নাৱাঃ সিরা যস্মিন্ন ৱিদ্যন্ত ইত্যস্নাৱিরম্। অৱ্রণমস্নাৱিরমিত্যেতাভ্যাং স্থূলশরীরপ্রতিষেধঃ। শুদ্ধং নির্মলমৱিদ্যামলরহিতমিতি কারণশরীরপ্রতিষেধঃ। অপাপৱিদ্ধং ধর্মাধর্মাদিপাপৱর্জিতম্। শুক্রমিত্যাদীনি ৱচাংসি পুংলিঙ্গত্ৱেন পরিণেযানি? স পর্যগাত্ ইত্যুপক্রম্য কৱির্মনীষী ইত্যাদিনা পুংলিঙ্গত্ৱেনোপসংহারাত্। কৱিঃ ক্রান্তদর্শী সর্ৱদৃক্? নান্যোঽতোঽস্তি দ্রষ্টা ইত্যাদিশ্রুতেঃ। মনীষী মনস ঈষিতা? সর্ৱজ্ঞ ঈশ্ৱর ইত্যর্থঃ। পরিভূঃ সর্ৱেষাং পরি উপরি ভৱতীতি পরিভূঃ। স্ৱযংভূঃ স্ৱযমেৱ ভৱতীতি? যেষামুপরি ভৱতি যশ্চোপরি ভৱতি স সর্ৱঃ স্ৱযমেৱ ভৱতীতি স্ৱযংভূঃ। স নিত্যমুক্ত ঈশ্ৱরঃ যাথাতথ্যতঃ সর্ৱজ্ঞত্ৱাত্ যথাতথাভাৱো যাথাতথ্যং তস্মাত্ যথাভূতকর্মফলসাধনতঃ অর্থান্ কর্তৱ্যপদার্থান্ ৱ্যদধাত্ ৱিহিতৱান্? যথানুরূপং ৱ্যভজদিত্যর্থঃ। শাশ্ৱতীভ্যঃ নিত্যাভ্যঃ সমাভ্যঃ সংৱত্সরাখ্যেভ্যঃ প্রজাপতিভ্য ইত্যর্থ॥ অত্রাদ্যেন মন্ত্রেণ সর্ৱৈষণাপরিত্যাগেন জ্ঞাননিষ্ঠোক্তা প্রথমো ৱেদার্থঃ ঈশাৱাস্যমিদং সর্ৱম্ মা গৃধঃ কস্য স্ৱিদ্ধনম্ ইতি। অজ্ঞানাং জিজীৱিষূণাং জ্ঞাননিষ্ঠাসংভৱে কুর্ৱন্নেৱেহ কর্মাণি জিজীৱিষেত্ ইতি কর্মনিষ্ঠোক্তা দ্ৱিতীযো ৱেদার্থঃ। অনযোশ্চ নিষ্ঠযোর্ৱিভাগো মন্ত্রদ্ৱযপ্রদর্শিতযোর্বৃহদারণ্যকেঽপি দর্শিতঃ সোঽকামযত্ জাযা মে স্যাত্ ইত্যাদিনা অজ্ঞস্য কামিনঃ কর্মাণীতি। মন এৱাস্যাত্মা ৱাগ্জাযা ইত্যাদিৱচনাত্ অজ্ঞত্ৱং কামিত্ৱং চ কর্মনিষ্ঠস্য নিশ্িচতমৱগম্যতে। তথা চ তত্ফলং সপ্তান্নসর্গস্তেষ্ৱাত্মভাৱেনাত্মস্ৱরূপাৱস্থানম্। জাযাদ্যেষণাত্রযসংন্যাসেন চাত্মৱিদাং কর্মনিষ্ঠাপ্রাতিকূল্যেন আত্মস্ৱরূপনিষ্ঠৈৱ দর্শিতা কিং প্রজযা করিষ্যামো যেষাং নোঽযমাত্মাযং লোকঃ ইত্যাদিনা। যে তু জ্ঞাননিষ্ঠাঃ সংন্যাসিনস্তেভ্যঃ অসুর্যা নাম তে ইত্যাদিনা অৱিদ্ৱন্নিন্দাদ্ৱারেণাত্মনো যাথাত্ম্যম্ স পর্যগাত্ ইত্যেতদন্তৈর্মন্ত্রৈরুপদিষ্টম্। তে হ্যত্রাধিকৃতা ন কামিন ইতি। তথা চ শ্ৱেতাশ্ৱতরাণাং মন্ত্রোপনিষদি অত্যাশ্রমিভ্যঃ পরমং পৱিত্রং প্রোৱাচ সম্যগৃষিসংঘজুষ্টম্ ইত্যাদি ৱিভজ্যোক্তম্। যে তু কামিনঃ কর্মনিষ্ঠাঃ কর্ম কুর্ৱন্ত এৱ জিজীৱিষৱঃ? তেভ্য ইদমুচ্যতে অন্ধং তমঃ ইত্যাদি। কথং পুনরেৱমৱগম্যতে? ন তু সর্ৱেষাম্ ইতি উচ্যতে অকামিনঃ সাধ্যসাধনভেদোপমর্দেন যস্মিন্সর্ৱাণি ভূতানি আত্মৈৱাভূদ্ৱিজানতঃ। তত্র কো মোহঃ কঃ শোক একত্ৱমনুপশ্যতঃ ইতি যত্ আত্মৈকত্ৱৱিজ্ঞানম্? তন্ন কেনচিত্কর্মণা জ্ঞানান্তরেণ ৱা হ্যমূঢঃ সমুচ্চিচীষতি। ইহ তু সমুচ্চিচীষযা অৱিদ্ৱদাদিনিন্দা ক্রিযতে। তত্র চ যস্য যেন সমুচ্চযঃ সংভৱতি ন্যাযতঃ শাস্ত্রতো ৱা তদিহোচ্যতে। তদ্দৈৱং ৱিত্তং দেৱতাৱিষযং জ্ঞানং কর্মসংবন্ধিত্ৱেনোপন্যস্তং ন পরমাত্মজ্ঞানম্? ৱিদ্যযা দেৱলোকঃ ইতি পৃথক্ফলশ্রৱণাত্। তযোর্জ্ঞানকর্মণোরিহৈকৈকানুষ্ঠাননিন্দা সমুচ্চিচীষযা? ন নিন্দাপরৈৱ একৈকস্য? পৃথক্ফলশ্রৱণাত্ ৱিদ্যযা তদারোহন্তি ৱিদ্যযা দেৱলোকঃ ন তত্র দক্ষিণা যান্তি কর্মণা পিতৃলোকঃ ইতি। ন হি শাস্ত্রৱিহিতং কিংচিদকর্তৱ্যতামিযাত্। তত্র

অন্ধং তমঃ প্রৱিশন্তি যে़ঽৱিদ্যামুপাসতে ।

ততো ভূয ইৱ তে তমো য উ ৱিদ্যাযা্ঁরতাঃ ॥ ১.১.৯ ॥

॥১.১.৯॥ অন্ধং তমঃ অদর্শনাত্মকং তমঃ প্রৱিশন্তি। কে যে অৱিদ্যাম্? ৱিদ্যাযা অন্যা অৱিদ্যা কর্মেত্যর্থঃ? কর্মণো ৱিদ্যাৱিরোধিত্ৱাত্? তামৱিদ্যামগ্নিহোত্রাদিলক্ষণামেৱ কেৱলাম্ উপাসতে তত্পরাঃ সন্তোঽনুতিষ্ঠন্তীত্যভিপ্রাযঃ। ততঃ তস্মাদন্ধাত্মকাত্তমসঃ ভূয ইৱ বহুতরমেৱ তে তমঃ প্রৱিশন্তি। কে কর্ম হিত্ৱা যে উ যে তু ৱিদ্যাযামেৱ দেৱতাজ্ঞানে এৱ রতাঃ অভিরতাঃ॥ তত্রাৱান্তরফলভেদং ৱিদ্যাকর্মণোঃ সমুচ্চযকারণমাহ। অন্যথা ফলৱদফলৱতোঃ সংনিহিতযোরঙ্গাঙ্গিতযা জামিতৈৱ স্যাদিতি

অন্যদেৱাহুর্ৱিদ্যযাঽন্যদাহুরৱিদ্যযা ।

ইতি শুশ্রুম ধীরাণাং যে নস্তদ্ৱিচচক্ষিরে ॥ ১.১.১০ ॥

॥১.১.১০॥ অন্যত্ পৃথগেৱ ৱিদ্যযা ক্রিযতে ফলমিতি আহুঃ ৱদন্তি? অন্যদাহুরৱিদ্যযা কর্মণা ক্রিযতে ফলমিতি। তথোক্তম্ কর্মণা পিতৃলোকঃ? ৱিদ্যযা দেৱলোকঃ ইতি। ইতি এৱং শুশ্রুম শ্রুতৱন্তো ৱযং ধীরাণাং ধীমতাং ৱচনম্। যে আচার্যা নঃ অস্মভ্যং তত্ কর্ম চ জ্ঞানং চ ৱিচচক্ষিরে ৱ্যাখ্যাতৱন্তঃ? তেষামযমাগমঃ পারম্পর্যাগত ইত্যর্থঃ॥ যত এৱমতঃ

ৱিদ্যাং চাৱিদ্যাং চ যস্তদ্ৱেদোভযঁ্ সহ ।

অৱিদ্যযা মৃত্যুং তীর্ত্ৱা ৱিদ্যযাঽমৃতমশ্নুতে ॥ ১.১.১১ ॥

॥১.১.১১॥ ़

ৱিদ্যাং চ অৱিদ্যাং চ দেৱতাজ্ঞানং কর্ম চেত্যর্থঃ। যস্তত্ এতদুভযং সহ একেন পুরুষেণ অনুষ্ঠেযং ৱেদ তস্যৈৱং সমুচ্চযকারিণ একৈকপুরুষার্থসংবন্ধঃ ক্রমেণ স্যাদিত্যুচ্যতে অৱিদ্যযা কর্মণা অগ্নিহোত্রাদিনা মৃত্যুম্? স্ৱাভাৱিকং কর্ম জ্ঞানং চ মৃত্যুশব্দৱাচ্যম্? তদুভযং তীর্ত্ৱা অতিক্রম্য ৱিদ্যযা দেৱতাজ্ঞানেন অমৃতং দেৱতাত্মভাৱম্ অশ্নুতে প্রাপ্নোতি। তদ্ধ্যমৃতমুচ্যতে? যদ্দেৱতাত্মগমনম্॥ অধুনা ৱ্যাকৃতাৱ্যাকৃতোপাসনযোঃ সমুচ্চিচীষযা প্রত্যেকং নিন্দোচ্যতে

অন্ধং তমঃ প্রৱিশন্তি যেঽসংভূতিমুপাসতে ।

ততো ভূয ইৱ তে তমো য উ সংভূত্যাঁ্ রতাঃ ॥ ১.১.১২ ॥

॥১.১.১২॥ অন্ধং তমঃ প্রৱিশন্তি যে অসংভূতিম্? সংভৱনং সংভূতিঃ সা যস্য কার্যস্য সা সংভূতিঃ তস্যা অন্যা অসংভূতিঃ প্রকৃতিঃ কারণম্ অৱ্যাকৃতাখ্যম্? তামসংভূতিমৱ্যাকৃতাখ্যাং প্রকৃতিং কারণমৱিদ্যাং কামকর্মবীজভূতামদর্শনাত্মিকাম্ উপাসতে যে তে তদনুরূপমেৱান্ধং তমঃ অদর্শনাত্মকং প্রৱিশন্তি। ততঃ তস্মাদপি ভূযো বহুতরমিৱ তমঃ তে প্রৱিশন্তি যে উ সংভূত্যাং কার্যব্রহ্মণি হিরণ্যগর্ভাখ্যে রতাঃ॥ অধুনা উভযোরুপাসনযোঃ সমুচ্চযকারণমৱযৱফলভেদমাহ

অন্যদেৱাহুঃ সংভৱাদন্যদাহুরসংভৱাত্ ।

ইতি শুশ্রুম ধীরাণাং যে নস্তদ্ৱিচচক্ষিরে ॥ ১.১.১৩ ॥

॥১.১.১৩॥ অন্যদেৱ পৃথগেৱ আহুঃ ফলং সংভৱাত্ সংভূতেঃ কার্যব্রহ্মোপাসনাত্ অণিমাদ্যৈশ্ৱর্যলক্ষণম্ আখ্যাতৱন্ত ইত্যর্থঃ। তথা চ অন্যদাহুরসংভৱাত্ অসংভূতেঃ অৱ্যাকৃতাত্ অৱ্যাকৃতোপাসনাত্ যদুক্তম্ অন্ধং তমঃ প্রৱিশন্তি ইতি? প্রকৃতিলয ইতি চ পৌরাণিকৈরুচ্যতে। ইতি এৱং শুশ্রুম ধীরাণাং ৱচনং যে নস্তদ্ৱিচচক্ষিরে ৱ্যাকৃতাৱ্যাকৃতোপাসনফলং ৱ্যাখ্যাতৱন্ত ইত্যর্থঃ॥ যত এৱম্? অতঃ সমুচ্চযঃ সংভূত্যসংভূত্যুপাসনযোর্যুক্তঃ একৈকপুরুষার্থত্ৱাচ্চেত্যাহ

সংভূতিং চ ৱিনাশং চ যস্তদ্ৱেদোভযঁ্ সহ ।

ৱিনাশেন মৃত্যুং তীর্ত্ৱা সংভূত্যাঽমৃতমশ্নুতে ॥ ১.১.১৪ ॥

॥১.১.১৪॥ সংভূতিং চ ৱিনাশং চ যস্তদ্ৱেদোভযং সহ? ৱিনাশেন? ৱিনাশো ধর্মো যস্য কার্যস্য স তেন ধর্মিণা অভেদেনোচ্যতে ৱিনাশঃ ইতি। তেন তদুপাসনেনানৈশ্ৱর্যমধর্মকামাদিদোষজাতং চ মৃত্যুং তীর্ত্ৱা? হিরণ্যগর্ভোপাসনেন হ্যণিমাদিপ্রাপ্তিঃ ফলম্? তেনানৈশ্ৱর্যাদিমৃত্যুমতীত্য? অসংভূত্যা অৱ্যাকৃতোপাসনযা অমৃতং প্রকৃতিলযক্ষণম্ অশ্নুতে। সংভূতিং চ ৱিনাশং চ ইত্যত্রাৱর্ণলোপেন নির্দেশো দ্রষ্টৱ্যঃ? প্রকৃতিলযফলশ্রুত্যনুরোধাত্॥ মানুষদৈৱৱিত্তসাধ্যং ফলং শাস্ত্রলক্ষণং প্রকৃতিলযান্তম্ এতাৱতী সংসারগতিঃ। অতঃ পরং পূর্ৱোক্তম্ আত্মৈৱাভূদ্ৱিজানতঃ ইতি সর্ৱাত্মভাৱ এৱ সর্ৱৈষণাসংন্যাসজ্ঞাননিষ্ঠাফলম্। এৱং দ্ৱিপ্রকারঃ প্রৱৃত্তিনিৱৃত্তিলক্ষণো ৱেদার্থোঽত্র প্রকাশিতঃ। তত্র প্রৱৃত্তিলক্ষণস্য ৱেদার্থস্য ৱিধিপ্রতিষেধলক্ষণস্য কৃত্স্নস্য প্রকাশনে প্রৱর্গ্যান্তং ব্রাহ্মণমুপযুক্তম্। নিৱৃত্তিলক্ষণস্য প্রকাশনে অত ঊর্ধ্ৱং বৃহদারণ্যকম্। তত্র নিষেকাদিশ্মশানান্তং কর্ম কুর্ৱন্ জিজীৱিষেদ্যো ৱিদ্যযা সহাপরব্রহ্মৱিষযযা? তদুক্তম্ ৱিদ্যাং চাৱিদ্যাং চ যস্তদ্ৱেদোভয্হ। অৱিদ্যযা মৃত্যুং তীর্ত্ৱা ৱিদ্যযামৃতমশ্নুতে ইতি? তত্র সোঽধিকারী কেন মার্গেণামৃতত্ৱমশ্নুতে ইত্যুচ্যতে তদ্যত্তত্সত্যমসৌ স আদিত্যো য এষ এতস্মিন্মণ্ডলে পুরুষো যশ্চাযং দক্ষিণেঽক্ষন্পুরুষঃ এতদুভযং সত্যং ব্রহ্মোপাসীনঃ যথোক্তকর্মকৃচ্চ যঃ? সোঽন্তকালে প্রাপ্তে সত্যাত্মানমাত্মনঃ প্রাপ্তিদ্ৱারং যাচতে

হিরণ্মযেন পাত্রেণ সত্যস্যাপিহিতং মুখম্ ।

তত্ত্ৱং পূষন্নপাৱৃণু সত্যধর্মায দৃষ্টযে ॥ ১.১.১৫ ॥

॥১.১.১৫॥ হিরণ্মযেন পাত্রেণ হিরণ্মযমিৱ হিরণ্মযম্? জ্যোতির্মযমিত্যেতত্? তেন পাত্রেণেৱ অপিধানভূতেন সত্যস্য আদিত্যমণ্ডলস্থস্য ব্রহ্মণঃ অপিহিতম্ আচ্ছাদিতং মুখং দ্ৱারম্ তত্ ত্ৱং হে পূষন্ অপাৱৃণু অপসারয সত্যধর্মায তৱ সত্যস্যোপাসনাত্সত্যং ধর্মো যস্য মম সোঽহং সত্যধর্মা তস্মৈ মহ্যম্ অথৱা? যথাভূতস্য ধর্মস্যানুষ্ঠাত্রে? দৃষ্টযে তৱ সত্যাত্মন উপলব্ধযে॥

পূষন্নেকর্ষে যম সূর্য প্রাজাপত্য ৱ্যূহ রশ্মীন্ সমূহ তেজঃ ।

যত্তে রূপং কল্যাণতমং তত্তে পশ্যামি যোঽসাৱসৌ পুরূষঃ সোঽহমস্মি ॥ ১.১.১৬ ॥

॥১.১.১৬॥ হে পূষন্ জগতঃ পোষণাত্পূষা রৱিঃ। তথা এক এৱ ঋষতি গচ্ছতীত্যেকর্ষিঃ হে একর্ষে। তথা সর্ৱস্য সংযমনাদ্যমঃ হে যম। তথা রশ্মীনাং প্রাণানাং রসানাং চ স্ৱীকরণাত্সূর্যঃ হে সূর্য। প্রজাপতেরপত্যং প্রাজাপত্যঃ হে প্রাজাপত্য। ৱ্যূহ ৱিগময রশ্মীন্ স্ৱান্। সমূহ একীকুরু উপসংহর তেজঃ তাৱকং জ্যোতিঃ। যত্ তে তৱ রূপং কল্যাণতমম্ অত্যন্তশোভনম্? তত্ তে তৱাত্মনঃ প্রসাদাত্ পশ্যামি। কিংচ? অহং ন তু ত্ৱাং ভৃত্যৱদ্যাচে যোঽসৌ আদিত্যমণ্ডলস্থঃ অসৌ ৱ্যাহৃত্যৱযৱঃ পুরুষঃ পুরুষাকারত্ৱাত্? পূর্ণং ৱানেন প্রাণবুদ্ধ্যাত্মনা জগত্সমস্তমিতি পুরুষঃ পুরি শযনাদ্ৱা পুরুষঃ। সোঽহম্ অস্মি ভৱামি॥

ৱাযুরনিলমমৃতমথেদং ভস্মান্ত্ঁশরীরম্ ।

ক্রতো স্মর কৃতঁ্ স্মর ক্রতো স্মর কৃতঁ্ স্মর ॥ ১.১.১৭ ॥

॥১.১.১৭॥ অথেদানীং মম মরিষ্যতো ৱাযুঃ প্রাণঃ অধ্যাত্মপরিচ্ছেদং হিত্ৱা অধিদৈৱতাত্মানং সর্ৱাত্মকম্ অনিলম্ অমৃতং সূত্রাত্মানং প্রতিপদ্যতামিতি ৱাক্যশেষঃ। লিঙ্গং চেদং জ্ঞানকর্মসংস্কৃতমুত্ক্রামত্ৱিতি দ্রষ্টৱ্যম্? মার্গযাচনসামর্থ্যাত্। অথ ইদং শরীরমগ্নৌ হুতং ভস্মান্তং ভস্মাৱশেষং ভূযাত্। ওমিতি যথোপাসনম্ ওংপ্রতীকাত্মকত্ৱাত্সত্যাত্মকমগ্ন্যাখ্যং ব্রহ্মাভেদেনোচ্যতে। হে ক্রতো সংকল্পাত্মক স্মর যন্মম স্মর্তৱ্যং তস্য কালোঽযং প্রত্যুপস্থিতঃ? অতঃ স্মর এতাৱন্তং কালং ভাৱিতং কৃতম্ অগ্নে স্মর যন্মযা বাল্যপ্রভৃত্যনুষ্ঠিতং কর্ম তচ্চ স্মর। ক্রতো স্মর কৃতং স্মর ইতি পুনর্ৱচনমাদরার্থম্॥ পুনরন্যেন মন্ত্রেণ মার্গং যাচতে

অগ্নে নয সুপথা রাযে অস্মান্ৱিশ্ৱানি দেৱ ৱযুনানি ৱিদ্ৱান্ ।

যুযোধ্যস্মজ্জুহুরাণমেনো ভূযিষ্ঠাং তে নম উক্তিং ৱিধেম ॥ ১.১.১৮ ॥

॥১.১.১৮॥ হে অগ্নে নয গময সুপথা শোভনেন মার্গেণ। সুপথেতি ৱিশেষণং দক্ষিণমার্গনিৱৃত্ত্যর্থম্। নির্ৱিণ্ণোঽহং দক্ষিণেন মার্গেণ গতাগতলক্ষণেন অতো যাচে ত্ৱাং পুনঃ পুনঃ গমনাগমনৱর্জিতেন শোভনেন পথা নয। রাযে ধনায? কর্মফলভোগাযেত্যর্থঃ। অস্মান্ যথোক্তধর্মফলৱিশিষ্টান্ ৱিশ্ৱানি সর্ৱাণি হে দেৱ ৱযুনানি কর্মাণি? প্রজ্ঞানানি ৱা ৱিদ্ৱান্ জানন্। কিংচ? যুযোধি ৱিযোজয ৱিনাশয অস্মত্ অস্মত্তঃ জুহুরাণং কুটিলং ৱঞ্চনাত্মকম্ এনঃ পাপম্। ততো ৱযং ৱিশুদ্ধাঃ সন্তঃ ইষ্টং প্রাপ্স্যাম ইত্যভিপ্রাযঃ। কিংতু ৱযমিদানীং তে ন শক্নুমঃ পরিচর্যাং কর্তুম্ভূযিষ্ঠাং বহুতরাং তে তুভ্যং নমউক্তিং নমস্কারৱচনং ৱিধেম নমস্কারেণ পরিচরেম ইত্যর্থঃ॥ অৱিদ্যযা মৃত্যুং তীর্ত্ৱা ৱিদ্যযামৃতমশ্নুতে ৱিনাশেন মৃত্যুং তীর্ত্ৱা অসংভূত্যামৃতমশ্নুতে ইতি শ্রুত্ৱা কেচিত্সংশযং কুর্ৱন্তি। অতস্তন্নির্ধারণার্থং সংক্ষেপতো ৱিচারণাং করিষ্যামঃ। তত্র তাৱত্কিংনিমিত্তঃ সংশয ইতি? উচ্যতে ৱিদ্যাশব্দেন মুখ্যা পরমাত্মৱিদ্যৈৱ কস্মান্ন গৃহ্যতে? অমৃতত্ৱং চ ননূক্তাযাঃ পরমাত্মৱিদ্যাযাঃ কর্মণশ্চ ৱিরোধাত্সমুচ্চযানুপপত্তিঃ। সত্যম্। ৱিরোধস্তু নাৱগম্যতে? ৱিরোধাৱিরোধযোঃ শাস্ত্রপ্রমাণকত্ৱাত্ যথা অৱিদ্যানুষ্ঠানং ৱিদ্যোপাসনং চ শাস্ত্রপ্রমাণকম্? তথা তদ্ৱিরোধাৱিরোধাৱপি। যথা চ ন হিংস্যাত্সর্ৱা ভূতানি ইতি শাস্ত্রাদৱগতং পুনঃ শাস্ত্রেণৈৱ বাধ্যতে অধ্ৱরে পশুং হিংস্যাত্ ইতি? এৱং ৱিদ্যাৱিদ্যযোরপি স্যাত্ ৱিদ্যাকর্মণোশ্চ সমুচ্চযঃ। ন দূরমেতে ৱিপরীতে ৱিষূচী অৱিদ্যা যা চ ৱিদ্যেতি জ্ঞাতা ইতি শ্রুতেঃ। ৱিদ্যাং চাৱিদ্যাং চ ইতি ৱচনাদৱিরোধ ইতি চেত্? ন হেতুস্ৱরূপফলৱিরোধাত্। ৱিদ্যাৱিদ্যাৱিরোধাৱিরোধযোর্ৱিকল্পাসংভৱাত্ সমুচ্চযৱিধানাদৱিরোধ এৱেতি চেত্? ন সহসংভৱানুপপত্তেঃ। ক্রমেণৈকাশ্রযে স্যাতাং ৱিদ্যাৱিদ্যে ইতি চেত্? ন ৱিদ্যোত্পত্তৌ তদাশ্রযেঽৱিদ্যানুপপত্তেঃ ন হি অগ্নিরুষ্ণঃ প্রকাশশ্চ ইতি ৱিজ্ঞানোত্পত্তৌ যস্মিন্নাশ্রযে তদুত্পন্নম্? তস্মিন্নেৱাশ্রযে শীতোঽগ্নিরপ্রকাশো ৱা ইত্যৱিদ্যাযা উত্পত্তিঃ। নাপি সংশযঃ অজ্ঞানং ৱা? যস্মিন্সর্ৱাণি ভূতানি আত্মৈৱাভূদ্ৱিজানতঃ। তত্র কো মোহঃ কঃ শোক একত্ৱমনুপশ্যতঃ ইতি শোকমোহাদ্যসংভৱশ্রুতেঃ। অৱিদ্যাসংভৱাত্তদুপাদানস্য কর্মণোঽপ্যনুপপত্তিমৱোচাম। অমৃতমশ্নুতে ইত্যাপেক্ষিকমমৃতম্ ৱিদ্যাশব্দেন পরমাত্মৱিদ্যাগ্রহণে হিরণ্মযেন ইত্যাদিনা দ্ৱারমার্গযাচনমনুপপন্নং স্যাত্। তস্মাত্ যথাৱ্যাখ্যাত এৱ মন্ত্রাণামর্থ ইত্যুপরম্যতে॥ ইতি শ্রীমত্পরমহংসপরিৱ্রাজকাচার্যস্য

শ্রীগোৱিন্দভগৱত্পূজ্যপাদশিষ্যস্য

শ্রীমচ্ছংকরভগৱতঃ কৃতৌ

ঈশাৱাস্যোপনিষদ্ভাষ্যম্

সংপূর্ণম্॥

Hits: 271